افضل وجهات شهر العسل في 2020
وجهات Destinations

افضل وجهات شهر العسل في 2020

on
يناير 6, 2020

افضل وجهات شهر العسل في 2020 … حبيت تكون أول مقالة اكتبها في 2020 لأن يمكن دي اكتر حاجه بتسأل عنها دايما .

اتكلمنا قبل كده بالتفصيل عن ازاي تخطط لشهر العسل , و اتكلمنا عن كل الخطوات اللي المفروض تعملها من بدري قبل السفر لرحلة العمر دي , بس دايما انت لو واحد مسافرش قبل كده , او حتي سافرت قبل كده و هتتجوز قريب و بتفكر تسافر انت و شريكة حياتك بره في شهر العسل , بتكون فيه حيرة كبيرة .

حيرة لأن فيه بلاد ينفع تكون مثالية لشهر العسل , و فيه بلاد تانية متنفعش لشهر العسل … علشان كده المقالة دي هنتكلم فيها بالتفصيل عن كذا يلد من وجهة نظري بعتبرهم مثاليين لشهر العسل , حطيت في اعتباري و انا بكتب المقالة دي التكلفة و في نفس الوقت القرب من بلادنا العربية أو سهولة الطيران منها , بمعني دولة زي “فيجي” مثلا عالميا تعتبر روعة لشهر العسل , لكن بالنسبالنا هي بعيدة جدا و حتي الطيران ليها من بلادنا مكلف جدا , علشان كده مش هذكرها في المقالة … و هكذا .

افضل وجهات شهر العسل في 2020

 

 

 

يا تري ايه هي افضل وجهات شهر العسل في 2020 ؟

الاجابة عن السؤال ده مش بالسهولة دي , ببساطة لان كل واحد فينا له ذوق مختلف , مش بس كده , انت و شريكة حياتك نفسكم ممكن يبقي ذوقكم مختلف عن بعض .

فمثلا ممكن تكون نفسك تروح تايلند مثلا في شهر العسل بس شريكة حياتك نفسها تروح تركيا , علشان كده مهم جدا ترجع للمقالة بتاعة ازاي تخطط لشهر العسل انت و شريك حياتك قبل ما تقرأ المقالة دي .

و دلوقتي هنتكلم عن كذا وجهة و ايه مزاياهم كوجهات لشهر العسل …

 

 

 

1- تركيا:

تركيا من أكبر وجهات شهر العسل المحببة عند الشباب العربي المقبل علي الزواج , مش بس علشان قربها او تكلفتها القليلة للسفر ليها , بس كمان لأن كل مدينة فيها ليها طعم خاص بيها …

 

فيزا تركيا و التصريح الأمني

 

مبدأيا اتكلمنا عن فيزا تركيا و لو انت مصري كمان اتكلمنا عن التصريح الأمني بالتفصيل هنا , و كمان اتكلمنا عن اسطنبول و تعمل ايه فيها أول مره , بس نصيحة مني خلي اسطنبول جزء بسيط من شهر العسل بتاعك و حاول تسافر مدن تاني في تركيا, الجنوب التركي معظمه مدن ساحلية سياحية جميلة جدا , و برضه اتكلمنا عن قرية تشيرالي الساحرة و اللي بعتبرها جنة ناس كتير مسمعتش عنها … الشمال التركي كله طبيعة و خضره …

حاول تقرأ كتير عن تركيا و مدنها , و ارشحلك جدا منتدي Trip Advisor الخاص بتركيا , هتلاقي عليها معلومات كتييير جدا عن مدن تركيا .

 

 

 

 

 

2- كرواتيا:

 

كرواتيا

 

كروتيا من أكتر البلاد المحببة لقلبي , و من أجمل وجهات شهر العسل , ثقافة البلقان من الثقافات الدافية أوي و الشعب الكرواتي من اطيب الشعوب .

كرواتيا كمان من البلاد اللي هتلاقي فيها تنوع كبير في مدنها سواء لو كنتو بتحبوا الطابع الأوروبي و المعمار او بتحبوا الطبيعة أو حتي من محبي مسلسل Game of Thrones و اللي شافو المسلسل عايز اقول لكم انك تقدر تتمشي في ال King’s Landing في مدينة دبروفنيك الكرواتية .

دبروفنيك

 

اتكلمنا برضه بالتفصيل عن ايه اللي لازم تعرفه قبل ما تزور كرواتيا , و اتكلمنا كمان عن ازاي تطلع فيزا كرواتيا بكل سهولة , و كمان اتكلمنا عن ليه لازم تزور بحيرات بليتفيتسا الساحرة في كرواتيا , و لسه ان شاء الله هكتب مقالات تانية عن مدن و جزر كرواتيا المختلفة اللي هتساعدك في التخطيط لشهر العسل هناك .

 

 

 

 

3- ايسلندا:

مينفعش اذكر افضل وجهات شهر العسل من غير ما اجيب سيرة ايسلندا . دايما لما اي حد يسألني ايه اكتر بلد حبيتها من بين كل البلاد اللي زرتها ؟ من غير تفكير بجاوب ايسلندا … و صدقني دي اجابة اي حد يزور البلد دي ..

ايسلندا

 

ببساطة لأن ايسلندا صعب أوووي تقارنها بأي بلد , من أول ما رجلك تلمس البلد دي هتحس انها بلد من الأحلام … سواء الطبيعة أو الجو او كل حاجه حواليك …

ايسلندا يمكن هي أغلي دولة من الدول اللي في قايمة افضل وجهات شهر العسل في 2020 , و حالها كحال معظم الدول الاسكندنافية , لكن صدقني تجربة شهر العسل فيها مش هتنسوها طول عمركم …

 

ايسلندا

 

مبدأيا لو خايف من فيزا الشنجن , فعايز أقولك فرصة انك تاخد الشنجن اول مرة بتبقي سهلة جدا لو هتاخدها في شهر العسل , و 95 % من اللي اعرفهم قدموا علي الشنجن بغرض السفر لشهر العسل خدوها كلهم و يمكن كان فيهم كتير باسبوره ابيض مسافرش ولا مره قبل كده , و كمان متنساش تقرأ مقالة ازاي تضمن فيزا الشنجن .

أما لو خلاص قررت تسافر ايسلندا , يبقي أقرأ المقالة دي هتفيدك أوي في التخطيط لأيسلندا.

 

 

 

4- المغرب:

المغرب من البلاد المحببة لقلبي يمكن بسبب الثقافة او اللهجة و الناس ده غير مدنها اللي برضه كل مدينة فيهم ليها طعم و طابع خاص …

 

شفشاون المغرب

 

المغرب عالمية من الوجهات المحببة لشهر العسل جدا , و تعتبر من افضل وجهات شهر العسل في 2020 خصوصا في كل شهور السنة , انا يمكن طول عمري نفسي أوي ازور مدينة افران في الشتا و هي مغطاه بالثلوج , ده غير مدينة مراكش الساحرة بأسواقها و أكلاتها , ده غير طنجة و فاس و الدار البيضا و اغادير … في المغرب هتلاقي مدن كتير تناسب ذوقكم كزوجين بيقضوا شهر العسل .

 

 

 

5- اندونيسيا:

لما نجيب سيرة شهر العسل في جنوب شرق اسيا الكل بيقول تايلند و ماليزيا , او حتي بالي في اندونيسيا … بس المرادي انا بقترح عليك تطلع بره بالي اللي الكل بيروحها … اندونيسيا فيها حتت كتييير جدا و جزر ساحرة جددا غير بالي .

 

اندونيسيا

 

مبدأيا اندونيسيا من غير فيزا للمصريين و معظم الجنسيات العربية , فمش هتشيل هم تجهيز ورق للتأشيرة ووجع الدماغ ده …

حتت كتير ممكن تزورها في اندونيسيا زي جزر لومبوك و كومودو و جيلي اللي اهدا بكتير من بالي , او مدينة زي يوجياكرتا اللي هتلاقيها ممتعة جدا تاريخيا و ثقافيا.

 

 

 

6- سريلانكا:

سريلانكا كمان نقدر نعتبرها من افضل وجهات شهر العسل في 2020 , و ده بسبب طبيعتها الاستوائية الرائعة و كمان كونها رخيصة جدا لأي اتنين بيخططوا للسفر في شهر العسل.

سريلانكا

 

في سريلانكا هتلاقيها بتجمع بين الشواطيء الساحرة و مزارع الشاي اللي ملهاش مثيل , تجربة عمرك ما هتنساها انت و شريك حياتك.

 

 

7- جنوب أفريقيا:

من البلاد الرائعة اللي تستحق تقضي فيها شهر العسل , و اللي فعلا تعتبر من افضل وجهات شهر العسل في 2020 كونها بتجمع بين الطبيعة و الرومانسية و كمان المغامرة …

 

جنوب افريقيا

 

مدينة كيب تاون من اشهر المدن الخلابة في جنوب أفريقيا بشواطئها الرائعة و الأنشطة الكتير اللي ممكن تعملها في جنوب أفريقيا …

فلو حابب تجربة ملهاش مثيل في شهر العسل , أقرأ عن جنوب افريقيا , هتلاقيها دولة مميزة جدا تستاهل انك تسافرلها في شهر العسل.

 

 

 

 

 

دي كانت قائمة افضل وجهات شهر العسل في 2020 من وجهة نظري , طبعا في وجهات تانية كتييير مشهورين جدا زي فرنسا و اليونان و تايلندا و المالديف و غيرهم كتير , بس حبيت اتكلم اكتر عن الوجهات اللي مش مشهورة أوي كوجهات شهر عسل , و اللي فعلا هتستمتع فيهم جدا …

 

لو عندك اقتراحات لوجهات جميلة و حابب نضيفها للمقالة , او عندك اي استفسار متترددش انك تشاركني بيه .

TAGS
RELATED POSTS
Subscribe
نبّهني عن
guest
0 تعليقات
Inline Feedbacks
View all comments
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

0
حابب اعرف رأيك ، اترك تعليق :)x
()
x
تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

0
حابب اعرف رأيك ، اترك تعليق :)x
()
x