ازاي تحمي نفسك من التسمم الغذائي أثناء السفر…دليلك الكامل

by Mohamed Hammad
8 minutes read

متعة من متع السفر هو استكشاف أطباق و أكلات محلية من دول العالم اللي بتزورها , لكن كابوس التسمم الغذائي أثناء السفر من اكتر الكوابيس اللي بتخوف أي مسافر

مش معني خوفك من التسمم الغذائي هيخليك تبعد عن تجربة أكلات جديدة و مختلفة و انت مسافر … لكن فيه حاجات لازم تخلي بالك منها لو عملتها هتقدر تحمي نفسك من انك تفضل رايح جاي علي التواليت طول الرحلة .

[lwptoc colorScheme=”inherit” borderColor=”#dd8604″]

 

أيه أسباب التسمم الغذائي أثناء السفر :

 

ازاي تحمي نفسك من التسمم الغذائي أثناء السفر...دليلك الكامل 7

 

خلينا نتفق علي نقطة , مش معني انه جالك تسمم غذائي في دولة تانية معني كده ان الأكل في دولتك مفيهوش البكتيريا او الطفيليات المسببة للتسمم الغذائي , لكن الفكرة كلها أن دايما جسمك بيكون اتعود و كون مناعة ضد البكتيريا اللي في البلد اللي انت عايش فيها , فلما تزور بلد تانية وتاكل حاجه فيها بكتيريا جسمك مش متعود عليها ساعتها بتحس بأعراض التسمم الغذائي أثناء السفر و اللي بيخلي تجربة السفر كابوس …

 

 

لو اتكلمنا من ناحية طبية … فيه 3 حاجات بيسببوا التسمم الغذائي :

 

1- البكتيريا : و اشهرهم الإي كولاي E-Coli و أشكال الأصابة منها بتكون نزلات معوية أو التهابات الجهاز البولي … و من أشهر البكتيريا أيضا المسببة للتسمم الغذائي أثناء السفر هي السالمونيللا , و دي المسببة لحمي التيفود و الباراتيفود…

لازم تعرف ان البكتيريا مبتموتش بالبرودة او التجمد … علي العكس هي بتتحفظ بالتجمد , اللي بيقتل البكتيريا هي الحرارة , يكفي أن يكون الأكل مطهي علي حرارة 75 درجة مئوية علي الأقل لمدة 10 دقائق لقتل بكتيريا زي السالمونيللا …

2- الطفيليات : و دول أشهرهم الجيارديا و انواع تانية كتير بتسبب التسمم الغذائي .

 

3-الفيروسات : و منها فيروس الألتهاب الكبدي الوبائي أ , و السارس و الروتا … إلخ , تتنوع الأعراض حسب نوع الفيروس و بتتنوع من ارتفاع درجة الحرارة و التعب الجسماني , الأسهال , الكحة ,اعراض تخص الجهاز الهضمي … إلخ

 

 

بعد ما اتكلمنا طبيا عن أسباب التسمم الغذائي أثناء السفر , نتكلم دلوقتي عن النصائح اللي تخلي بالك منها و انت مسافر علشان تتفادي الأصابة و انت مسافر …

 

 

ازاي تحمي نفسك من التسمم الغذائي أثناء السفر الناتج عن الشرب ؟ :

ازاي تحمي نفسك من التسمم الغذائي أثناء السفر...دليلك الكامل 8

 

السوائل بصفة عامة من أكتر الحاجات اللي ممكن تسببلك تسمم غذائي لو مخلتش بالك كويس من النصائح اللي هقولهالك في المقالة دي … خلينا نتكلم عن حاجه حاجه بالتفصيل و ازاي تتفاداها :

 

-المياه :

اتعود دايما قبل ما تسافر تعمل بحث عن إذا كانت مياه الصنبور في البلد اللي هنزورها صالحة للشرب وللا لأ … دولة زي أيسلندا مثلا المياه فيها أمنه جدا للشرب … في بلنسية في أسباني مع أن مياه الصنبور نظيفة و صالحة للشرب إلي ان ناس كتير من أهل البلد نصحوني اني مشربهاش لأن سياح كتير تعبوا لما شربوها لانه ببساطة مش متعودين عليها …

و طبعا للأسم معظم دولنا العربية معظم مياه الصنبور غير صالحة للشرب بدون فلترة و تنقية للمياه …

طيب تعمل ايه لو البلد الي هتروحها لقيت ان مياه الصنبور غير صالحة للشرب ؟ … ساعتها مفيش قدامك غير انك متشربش غير مياه معدنية , و تتأكد دايما أن الزجاجة مغلقة كويس جدا و انت بتشتريها …

طيب افرض انك في مكان و مفيش امكانية انك تشتري مياه معدنية … يبقي قدامك حل من اتنين :

-الغليان : تغلي المياه كويس جدا قبل ما تشربها علي الأقل لمدة 3 دقائق .

-تستخدم منتجات لتنقية المياة , فيه منتجات كتير سهلة الحمل و الكفاءة و انت مسافر زي مثلا منتج  lifestraw و ده منتج مشهور بيقدر ينقي المياة من 99% من البكتيريا الموجودة و الطفيليات و الجزيئات الأكبر من 0.2 ميكرون و جعل المياة صالحة للشرب .. و فيه منتجات تانية كتير بتنقي المياة تقدر تشيلها و انت مسافر

 

 

-التلج :

حاجه تانية ممكن متاخدش بالك منها , و هي ان ساعات كتير التلج اللي بتلاقيه في العصير او اي مشروب بتشربه جايز جدا يكون معمول من مياه ملوثة , علشان كده حاول تبعد عن اي مشروبات بيتحط فيها تلج مشكوك في مصدره .

 

-الألبان و مشتقاتها :

دايما لازم تبعد عن اي مشروبات بيتحط فيها حليب او اي منتجاته تكون غير مبسترة , منتجات الألبان لو مش مبسترة بتنقل أمراض كتير جدا .

 

-الشاي و القهوة:

مفيش مشكلة من الشاي و القهوة , إلا لو كنت هتضيف حليب ليهم , فلازم تتأكد أنه مبستر و نضيف.

 

-عصائر الفواكة :

دايما خلي بالك من الطريقة اللي بتم عمل العصائر بيها و المعدات المستخدمة , لأن بسهولة ممكن يتنقل عدوي لو بتشتري عصير من مكان مش موثوق .

 

 

 

 

ازاي تحمي نفسك من التسمم الغذائي أثناء السفر الناتج عن الأكل ؟ :

 

ازاي تحمي نفسك من التسمم الغذائي أثناء السفر...دليلك الكامل 9

 

أيه الأكلات اللي لازم تبعد عنها :

 

-أي أكل نيء أو مش مستوي كويس : ابعد نهائي عن أي أكل مش مطبوخ علي نار عالية و مستوي كويس خصوصا الأسماك أو القشريات أو اللحوم و الدجاج و البيض . طبعا محبي السوشي و الستيك Medium rare زيي هيزعلوا 😀  , بس حاول متاكلش الأكلات دي إلا في مطاعم نضيفة جدا و واخدة تقييمات كتير إيجابية ..

-منتجات الألبان الغير مبسترة : زي الجبن و الزبادي و الحليب , متقربش من أي منتجان ألبان مجهولة المصدر ..

-الفواكة :التزم بالقاعدة الشهيرة في الفواكة “لو ينفع تقشرها , كُلها ” , اوعي تاكل اي فاكهة مش مقشرة لأنك متعرفش البكتيريا و المبيدات اللي موجودة علي القشرة , دايما الفاكهة لازم تبقي مغسولة كويس و مقشرة قبل الأكل .

-الخضراوات الورقية :الخضراوات و خصوصا الورقية ساعات كتير بيكون فيها طفيليات و بكتيريا , لازم تتغسل كويس جدا , و مينفعش تتغسل بمياه ملوثة (ارجع لكلامنا اللي فوق عن المياة)  فلازم تتأكد انها مغسولة بمياة نظيفة , و الأفضل انها تنطبخ كويس في درجة حرارة عالية و تبعد عن السلطات الفريش خصوصا من الأماكن الغير موثوقة .

 

 

هل أجرب أكل الشارع وللا لأ ؟

 

ازاي تحمي نفسك من التسمم الغذائي أثناء السفر...دليلك الكامل 10

 

اتكلمنا قبل كده في مقالة 10 غلطات حاول تتفاداهم لو هتسافر أول مرة أن من الغلطات المشهورة أنك تخاف تجرب أكل الشارع , لأني شخصيا بعتبر من أهم الحاجات اللي بتخليك تعرف ثقافة أي بلد هي أكلها التقليدي اللي في الشارع بعيد عن المطاعم السياحية الغالية …

بس مش معني كده انك تلغي أحساسك و حدسك و تاكل أي حاجه بغض النظر عن نضافتها أو لأ … علشان تتفادي التسمم الغذائي أثناء السفر لازم يكون عندك رؤية و تقدر تحدد إذا كان الأكل اللي هتشتريه ده أمان وللا لأ …

 

 

أهم النصائح اللي تاخد بالك منها قبل ما تشتري أكل الشارع :

 

ازاي تحمي نفسك من التسمم الغذائي أثناء السفر...دليلك الكامل 11

 

– راقب دايما البائع قبل الشراء : شوف شكل البائع و العربية او الستاند اللي واقف فيها , هل هو نضيف ؟, هل اللأكل النئ بعيد عن الأكل المطبوخ ؟ هل الأكل مغطي و للا مكشوف للذباب و الحشرات ؟ … إلخ

 

-شوف المكان اللي هتشتري منه زحمة وللا لأ : لازم دايما تشتري من المكان اللي علي طول زحمة , لأنك بتضمن انك هتلاقي أكتر أكل فريش و نضيف و أرخص سعر لأن لو مكانش متوفر فيه الحاجات دي مكانش الناس بقت تتهافت عليه …

 

في كل بلد زرتها دايما فاكر مطعم شعبي بيقدم أكل محلي مميز و دايما المطاعم دي بتكون زحمة … زي مثلا في أسطنبول المطاعم اللي بتقدم ال Balik Ekmek او سندوتش السمك تحت جسر جالاطا , أو مطعم ليدو في ريجا عاصمة لاتفيا , أو المطاعم اللي بتقدم Bocadillo de Calamares او سندوتش الكالاماري الشهير في مدريد … دايما هتلاقي أحسن أكل شارع مش موجود غير في المطاعم الزحمة .

 

ازاي تحمي نفسك من التسمم الغذائي أثناء السفر...دليلك الكامل 12

مطاعم سندوتشات السمك أسفل جسر جالاطا

 

-حاول تاكل في أوقات الوجبات في البلد اللي هتزورها : لأن معظم الأوقات دي هي اللي بتكون زحمة فبالتالي بيكون الأكل فريش و سخن , و ده بيقلل من فرص تلوث الأكل ده لو اتساب فترة بعد الطهي .

 

 

أخر نصيحة علشان تقي نفسك من التسمم الغذائي أثناء السفر هي أنك تغسل إيدك دايما بالماء و الصابون , و تحاول تشيل دايما معاك زجاجة جيل مطهر اليدين تستخدمه دايما قبل ما تمسك أي أكل بإيدك علشان تطمن أن متصيبكش أي عدوي …

لو عجبتك المقالة ، يبقي هتعجبك المقالات دي

Leave a Comment

10 − خمسة =

This website uses cookies to improve your experience. We'll assume you're ok with this, but you can opt-out if you wish. Accept Read More