فيزا كرواتيا

فيزا كرواتيا 2023 .. دليلك الكامل للحصول علي تأشيرة كرواتيا

by Mohamed Hammad
8 minutes read

فيزا كرواتيا هي من أكتر المواضيع اللي بتسأل عنها دايما , و ده بسبب شهرة كرواتيا سياحيا في أخر كام سنة و خصوصا بعد كأس العالم 2018 لما اتسلطت عليها الأضواء بعد وصول فريقها للنهائي ..

اتكلمنا قبل كده عن كرواتيا في أكتر من مقالة أهمها ” كرواتيا :كل اللي محتاج تعرفه قبل السفر لعروس البحر الأدرياتيكي” , لو بتفكر تسافر كرواتيا يبقي اقرأ المقالة دي الأول و بعدين تعالي كمل المقالة دي علشان تعرف بالتفصيل تقدم ازاي للفيزا و تضمنها ان شاء الله .

طيب قبل ما ندخل في تفاصيل الفيزا خلينا نتكلم الأول عن طبيعة كرواتيا كبلد علشان نفهم الفيزا ..

 

 

 

هل فيزا كرواتيا شنغن ؟:

كرواتيا اتحاد أوروبي

من يناير ٢٠٢٣ دخلت كرواتيا اتفاقية الشنغن ، و اصبحت فيزا كرواتيا هي فيزا شنغن .

و بالتالي مبقاش ليها فيزا منفصلة زي ما كان قبل كده.

 

 

 

معلومات لازم تبقي عارفها عن فيزا كرواتيا:

-فيزا كرواتيا قبل كده كانت دايما بتطلع multiple و ده لأنك لما تيجي تسافر جوا كرواتيا مثلا من مدينة split لمدينة Dubrovnik لازم تعدي علي جزء من الأراضي البوسنية اسمه  Neum Corridor  , هو فيه اتفاقية بين كرواتيا و البوسنة للنقل الحر بين البلدين للمواطنين و الأجانب فبالتالي و انت مسافر بين المدينتين دول مش هتلاقي نقاط تفتيش , ممكن بس تلاقي ضابط بيشوف الهويات و الجوازات يتأكد أنك داخل كرواتيا بطريقة شرعية لكن مفيش أختام ولا حاجه ..

 

منطقة Neum البوسنية

بس اللي لاحظته أن السفارة الكرواتية بتصدر معظم التأشيرات Multiple Entries  علشان ميحصلش مشاكل.

 

 

-فيزا كرواتيا “الشنجن” السارية المتعددة الدخول بعد ما تدخل بيها كرواتيا تقدر تدخل بيها (البوسنة “لمدة 15 يوم أو انتهاء صلاحية الفيزا ايهما اقرب , رومانيا , بلغاريا , قبرص ، تركيا … ) و بصراحة مينفعش تزور كرواتيا و متقضيش يوم علي الأقل في مدينة موستار الجميلة , انا عملت ده لما كنت هناك و اتكلمت عنه بالتفصيل هنا ” موستار : ليه لازم تزور أجمل مدينة في البلقان“.

 

 

ايه هي خطوات الحصول علي تأشيرة كرواتيا:

الخطوات اللي هتكلم فيها هي للمصريين و اللي بتشبه كثيرا الخطوات في معظم الدول العربية , لو بتقدم من مصر أو المغرب أو الجزائر أو الأردن أو السعودية فالتقديم عن طريق شركة VFS Global

 

مكتب استخراج فيزا كرواتيا و الأوراق المطلوبة للتأشيرة :

أولا بتدخل علي موقع VFS Global و تشوف الورق المطلوب , طبعا لكل دولة موقع خاص بالشركة , الرابط اللي حطيته خاص بالشركة في مصر , حتي تاريخ كتابة المقالة فالورق المطلوب هو الأتي:

1-أبليكيشن الفيزا : و دي لازم تملاها بتأني من غير أي غلطات و تمضيها , الأبليكيشن تقدر من هنا , و تقدر تملاها أونلاين من هنا و تطبعها جاهزة . و لو أني بفضل انك تنزلها فاضية الأول و تملاها يدويا بيكون أحسن .

2-باسبور: تم اصداره في أخر 10 سنين , و ساري لمدة 3 شهور بعد تاريخ أنتهاء الفيزا اللي هتقدم عليها.

3-صورة شخصية: خلفية بيضاء و مقاسها 3.5×4.5 سم .

4-تأمين صحي:و ده بتطلع من أي شركة سياحة أو تأمين و يكون مغطي الفترة اللي هتقعد فيها في كرواتيا.

5-حجز طيران:مبدأي أو مؤكد و تخلي بالك كويس جدا من تواريخ الحجز و اللي هتكتبها في الأبليكيشن علشان ميحصلش أي غلطات تؤدي لرفض الفيزا .

6-حجز فندق: لو حجزت مثلا من بوكنج أو اي موقع , يفضل بعد الحجز تتواصل مع الفندق تتأكد أن الحجز قائم , و ده لأن السفارة الكرواتية بتتواصل مع الفندق و تتأكد من الحجز .

7-كشف حساب بنكي: لمدة 6 شهور يكون فيه حركات و مبلغ لايقل عن ١٠٠ يورو لكل يوم هتقعده في كرواتيا , بمعني لو هتقعد 10 أيام يبقي يكون فيه لايقل عن ١٠٠٠ يورو . ياريت ترجع لمقالة “ازاي تضمن فيزا الشنجن” فيها معلومات كتير هتفيدك بخصوص فيزا الشنجن اللي تشبه كثيرا فيزا كرواتيا.

8-اثبات العمل: جواب HR من شغلك فيه طبيعة شغلك و مرتبك (اللي يا ريت يكون بيظهر في كشف الحساب اللي مقدمه) و الأجازة اللي هتسافر فيها لكرواتيا .

أما لو كنت طالب , فبتقدم شهادة قيد من مكان دراستك.

9-مصاريف الفيزا : و دول ٨٠ دولار أمريكي بتدفعهم في الحساب البنكي الخاص بالسفارة بالبنك التجاري الدولي CIB  و الفرع عنوانه : ٤٤ ش محمد مظهر ، الزمالك ، القاهرة

و دي بيانات الحساب اللي هتدفع فيه :

حساب سفارة كرواتيا

Account number in EUR : 100042690192

Swift Code: CIBEEGCX140

Telephone of the bank: +2 02 27362501.

 

بعد الإيداع بتاخد الوصل و بتقدمه مع الورق لمكتب VFS , خلي بالك أن الأيداع بيكون بالدولار , يعني مينفعش تروح البنك بالجنيه , لازم تحول بره الأول الفلوس لدولار , و فيه مكاتب صرافة كتير جنب البنك.

فيه مصاريف تانية للمكتب اثناء التقديم حوالي ٩٣٠ جنية مصري بتدفعهم بالجنية عند تقديم الورق .

وفيه خدمة من المكتب لتوصيل الباسبور لغاية باب بيتك بعد خروج الباسبور من السفارة , دي بتتكلف :

-١٤٥ جنية للتوصيل داخل القاهرة.

-٢٦٥ جنية للتوصيل خارج القاهرة.

vfs global croatia

طبعا البيانات دي كلها بتاريخ كتابة المقالة.

 

أوراق مش مطلوبة بس هتساعد جدا في الموافقة علي طلبك :

Cover letter : و ده خطاب بتكتبه و بترفقه مع الورق و ده بيكون موجه للسفارة الكرواتية و بتكتب فيه غرضك من السفر و أيه خط سيرك جوه كرواتيا , اتعود دايما لما بتقدم في أي سفارة تكتب الخطاب ده و خصوصا في السفارات اللي مفيهاش انترفيو , لان القنصل بيقيمك من ورقك , لما يلاقيك كاتب خطاب زي ده موضح فيه كل حاجه بيطمن انك شخص فاهم و مش ناوي تهرب أو تكسر فيزا , و اتكلمنا في المقالة دي بالتفصيل عن ازاي تكتب ال  cover letter.

صورة ضوئية من أي حجز لأي طيران داخلي أو اتوبيسات أو تذاكر لأي نشاطات سياحية ناوي تعملها جوا البلد : ده برضه هيساعد ان القنصل يتطمن و هو بيقيم ملفك للتأشيرة.

لو متزوج و عندك أطفال: و هتسافر لوحدك يبقي قدم صورة من قسيمة الزواج و شهادات ميلاد الأطفال .. الورق ده مش مطلوب بس هيثبت ان ليك روابط جوا بلدك هتخليك ترجع تاني.

لو مسافر تقضي شهر العسل مع شريك حياتك:قدم قسيمة الزواج أو لو لسه مخطوبين و هتتجوزوا قبل السفر قدم صورة من حجز قاعة الزفاف أو اي اثبات انكم هتتزوجوا او حتي صور خطوبتكم , و طبعا أي ورقة تكون مترجمة.

 

 

ما بعد تقديم الورق:

بعد تجهيز الورق بتتوجه لمكتب VFS و بتقدم الورق . و الأجراءات بتاخد حوالي 15 يوم عمل (أوقات كتير بتاخد أكتر من كده علي حسب الضغط علي السفارة) .

ساعات السفارة الكرواتية بتتواصل معاك تليفونيا لو محتاجين أي معلومات منك و أوقات ممكن يطلبوك لأنترفيو , بس ده نادر جدا.

بعد كده لما يرجع الباسبور للمكتب بتروح تستلمه أو بيوصلك للبيت لو اشتركت في خدمة التوصيل . و مبروك الفيزا 🙂

فيزا كرواتيا

فيزا كرواتيا القديمة قبل ما تبقي شنجن

 

قدمت قبل كده علي فيزا كرواتيا؟ حابب تشاركنا بتجربتك؟ عندك أي سؤال أو استفسار؟ شاركني بيه في الكومنتات أو علي صفحات التواصل الأجتماعي ..

 

لو عجبتك المقالة ، يبقي هتعجبك المقالات دي

11 comments

حماده سبتمبر 25, 2019 - 8:54 م

انا اخدت رفض رقم 8لسفاره كرواتيا هل يوجد تظلم

Reply
Mohamed Hammad
Mohamed Hammad سبتمبر 25, 2019 - 8:58 م

الافضل تتصل بالسفارة علي رقمهم : ‭
‭0227355815‬

و اسألهم انك خدت رفض و حابب تتظلم علي القرار و هما هيدلوك تعمل ايه بالضبط

Reply
حميد نوفمبر 13, 2019 - 12:29 ص

سلام الله عليكم أنا من المغرب.اشكرك اخي العزيز على المعلومات.جازاكم الله خيرا.

Reply
Mohamed Hammad
Mohamed Hammad نوفمبر 13, 2019 - 2:11 ص

العفو اخي العزيز ، و اهلا بيك و بكل اهل المغرب الغاليين 🙂

Reply
محمد عابد نوفمبر 25, 2019 - 11:12 ص

ممكن نسخة من البرنامج السياحي وكفر ليتر الى قدمته لسفارة كرواتيا

Reply
Mohamed Hammad
Mohamed Hammad نوفمبر 26, 2019 - 3:14 ص

هعمل مقالة قريب جدا عن ازاي تكتب cover letter ، بس لو محتاج نموذج بشكل اسرع راسلني علي الموقع و هبعتلك نموذج تقدر تعمل زيه

تحياتي ليك

Reply
nour.m.aldaour@gmail.com ديسمبر 30, 2019 - 9:11 ص

انا زوجي حصل على دعوة من اخوه المقيم في كرواتيا بالزيارة ولا ندرى كيف نحصل على موعد مقابلة وكيف نكتبcover letter ارجو المساعدة

Reply
Mohamed Hammad
Mohamed Hammad ديسمبر 31, 2019 - 12:08 م

اهلا بحضرتك

كل تفاصيل حجز الميعاد مكتوبة في المقالة و كذلك فيه مقاله منفصله عن ازاي تكتبي ال
Cover letter

Reply
Nour ديسمبر 28, 2019 - 4:29 م

بارك الله فيك جهد واضح ومعلومات قيمة
بل نسبة للمقيم في كرواتيا اقامة مؤقتة هل يحتاج فيزا للذهاب رحلة الى صربيا
وشكرا لجهودكم

Reply
Mohamed Hammad
Mohamed Hammad ديسمبر 28, 2019 - 4:35 م

اهلا بيك 🙂

لو معاك اقامة داخل كرواتيا تقدر تدخل صربيا و تقعد فيها لمدة ٩٠ يوم في فترة ٦ شهور من غير فيزا لصربيا.

Reply
Nour ديسمبر 29, 2019 - 4:23 م

شكرا جزيلا على افادتك وجهودك

Reply

Leave a Comment

خمسة عشر − خمسة =

This website uses cookies to improve your experience. We'll assume you're ok with this, but you can opt-out if you wish. Accept Read More