انك تختار الهوستل اللي هتنزل فيه انا بعتبره من أهم العوامل اللي بيعتمد عليها ارتياحك للسفرية اللي هتعملها خصوصا لو انت مسافر Backpacker
بعترف أنا كنت واحد من الناس مش متقبل فكرة الهوستل .. كنت شايف فكرة اني انزل في غرفة كبيرة مع ناس كتير فكرة مش مريحة , أو استخدام دورة مياة مشتركة , بس قررت إني أخوض التجربة و اشوف ليه كل اللي بيجرب الهوستل بيقرر انه يعتمد عليه في كل سفرياته …
اتكلمنا قبل كده عن الهوستل في مقالة “5 نصائح تخليك تسافر بأقل التكاليف” المفروض اني ابدأ و اقول ليه تنزل في هوستل بدل الفندق , بس انا هأجل ده لمقالة تانية , انهارده هقولك ازاي تختار الهوستل المثالي لو قررت تجرب الهوستل أول مره .. من خلال 10 نصائح لازم تهتم بيهم جدا ..
[lwptoc colorScheme=”inherit” borderColor=”#dd8604″]
1-أوعي تختار الهوستل فقط لأنه رخيص :
سبب من أسباب اختيارنا للأقامة في الهوستل هو لانه رخيص مقارنة بالفنادق مثلا , بس مش هو ده السبب فقط , علشان كده أوعي تخلي معيارك الوحيد لأختيارك بين الهوستلات هو السعر … بمعني لو لقيت مثلا ليلة في هوستل تمنها 25 يورو في وسط المدينة , و هوستل اخر تمن الليلة 10 يورو في مكان بعيد … لو فرحت بال10 يورو و حجزته من غير ما تحسب تمن المواصلات أو الخدمات اللي بيقدمها من افطار او واي فاي هتلاقي نفسك دفعت أكتر بكتير من انك لو كنت حجزت الهوستل اللي كان ب 25 يورو …
علشان كده خلي السعر معيار من ضمن المعايير اللي تخلي بالك منها لما تختار الهوستل , اوعي تخليه هو المعيار الرئيسي و الوحيد ..
2-المكان ثم المكان ثم المكان:
أهم حاجه اوعي تتنازل عنها لما تختار الهوستل هو مكانه , دايما لما اختار الهوستل باختار هوستل قريب من موقف الأتوبيسات او المترو او محطة القطر … بحيث لما تيجي تتنقل من مكان لمكان متاخدش وقت , اختيارك للمكان صدقني هيسهل عليك حاجات كتير أوي في سفريتك .
3-لازم تختار الهوستل شامل الأفطار :
أكتر حاجه ممكن تكرهني في أي هوستل هو لو كان مش شامل الأفطار , لما يكون شامل الأفطار فانت مش هتشيل هم وجبة في اليوم و تنزل تدور تشوف هتفطر فين … و برضه تخلي بالك ان الفطار ميكونش محدود زي مثلا بعض الهوستلات مبتقدمش غير توست و بيض و قهوة … و حتي ساعات بيخلوا الفطار من الساعة 7 صباحا لمدة ساعة واحده او ساعتين فقط و ده في الأغلب ممكن يخليك متلحقش تصحي و تنزل تفطر …
لما تيجي تختار الهوستل اتأكد انه بيقدم افطار محترم و انه يكون سايب وقت مناسب لفترة الأفطار , معظم الهوستلات المحترمة بتسيب الفطار لغاية 10 صباحا او حتي 11 صباحا ..
4-اوعي تختار الهوستل من غير خزنة lockers :
الأمان مهم جددددا في أي مكان تروحه و انت مسافر , علشان كده لازم تتأكد أن الهوستل اللي هتنزل فيه لازم يكون في خزنه شخصية ليك تحط فيها متعلقات الشخصية بمفتاح او قفل خاص ليك , 90% من الهوستلات فيها خزن شخصية في كل غرفة , لكن أوعي تحجز في هوستل مفيهوش خزنة .
5-اتأكد من ان فيه انترنت واي فاي و مجاني :
الأنترنت ضرورة لا بديل ليها طول ما انت مسافر سواء لو كنت مسافر عادي عايز تتواصل مع أهلك او تدور علي اي معلومات في البلد اللي انت فيها , او لو كنت مدون حابب تكتب عن البلد اللي انت فيها …
لازم تتأكد أن الهوستل اللي هتحجزه فيه واي فاي كويس , و مش بس كده , لازم تتأكد انه مجاني للنزلاء , لان فيه بعض الهوستلات بتخلي الانترنت اللي بتقدم بمقابل مادي , و ده لازم تخلي بالك منه لما تختار الهوستل .
6-اتأكد ان الهوستل فيه مكان مشترك للنزلاء يقعدوا فيه:
تجربة الهوستل حلوة مش بس لأنك توفر في الفلوس , الهدف منها انك تتواصل مع مسافرين زيهم زيك تستفيدوا من خبرات بعض و تكون صداقات جديدة من حول العالم … معظم الهوستلات المحترمة بيكون فيها مكان مشترك واسع Common Area .
لو كنت بتسافر لوحدك زيي في معظم سفرياتي , يبقي لازم تهتم أوي بالنقطة دي في الهوستل اللي هتخاره , لأن الأماكن المشتركة دي اللي هتقابل فيها مسافرين زيك و هتتبادلو حكاوي السفر و حتي تعرف نصائح و أماكن عن البلد اللي بتزورها عمرك ما سمعت عنها قبل كده …
7-أختار هوستل يكون بينظم فعاليات او انشطة للنزلاء :
فيه بعض الهوستلات ساعات بتنظم نشاطات للنزلاء زي مثلا ينظموا عشاء جماعي , او مسابقات أو حتي يستكشفوا المدينة اللي فيها الهوستل سوا , لو مسافر لوحدك حاول دايما تختار هوستل يكون كده , صدقني هتلاقي تجربة النزول فيه ممتعة جدا و مش هتنساها .
8-لما تختار الهوستل اتأكد ان الستاف بتوعه كويسين و بيساعدوا :
أهم حاجه بالنسبالي لما اختار الهوستل هو اني اتأكد ان الستاف كويسين و ودودين لأن صدقني دول اكتر ناس هيفيدوك و هيردوا علي كل استفساراتك لو عندك اي مشكلة , معظم الهوستلات اللي نزلت فيها في اسبانيا او ايسلندا او ليتوانيا او في معظم البلاد اللي زرتها كان دايما الشخص اللي قاعد علي ال front desk في الهوستل دايما بيكون مثقف و لذيذ و بيحاول دايما يساعدك , و دايما هتلاقي معظم الهوستلات المحترمة بتعين ناس كده .
9-قارن بين أسعار نفس الهوستل علي مواقع الحجز الألكترونية + موقع الهوستل :
و انت بتحجز لازم تقارن بين اسعار نفس الهوستل في كذا موقع علشان توصل لأرخص سعر , دايما انا بفضل Booking و برضه Hostelworld , و برضه لازم تشوف لو الهوستل ليه موقع رسمي شوف السعر عليه , و لو اني بفضل بوكنج لانه بيديك فرصة تحجز و تكنسل من غير ما تخسر أي فلوس لو قررت تلغي حجزك .
10-اقرأ التقييمات كويس جدا :
و دي اهم حاجه سبتها للأخر لأهميتها , لما تختار الهوستل لازم تقرأ تقييمات النزلاء اللي سبقوك في المواقع , لأن ده هيخليك تعرف كويس ايه ايجابيات و سلبيات الهوستل و يخليك تعرف تختار , اقرأ كل التقييمات و شوف تعليقات الناس علي ال 9 نقط اللي فوق من المكان و الستاف و الفطار و الحمامات و امكانيات الفندق … كل ده لازم تقرأ عنه كويس أوي …
أحسن هوستل نزلت فيه كان في ريكيافيك في ايسلندا , اسمه Galaxy pod hostel
و ده عجبني فيه أوي فكرة الكبسولات فيه , بحيث ان الغرفة فيها حوالي 8 كبسولات او كبائن , كل واحد بيكون ليه واحده منفصلة , جواها بيكون فيه مراية صغيرة و مكان تشحن منه موبايلك او لابتوبك , و تلفزيون صغير بسماعات , و تقدر تقفل علي نفسك الكبينة بيتاعتك لو حابب و تتحكم في النور في الكبينة
كانت تجربة رائعة خصوصا ان الستاف كانوا متعاونين جدا و امكانيات الهوستل رائعة , لو فيوم زرت ريكيافيك لازم تجرب الهوستل ده .
جربت تنزل في هوستل قبل كده ؟ عندك نصائح حابب تشاركنا بيها او اي سؤال؟ شاركنا بيه في الكومنتات او شبكات التواصل الأجتماعي
