ليتوانيا … ليه لازم تزور جوهرة بحر البلطيق علي الأقل مرة في العمر

ليتوانيا … ناس كتير مسمعتش عنها أصلا . و حتي معظم اللي سمع ميعرفش هي فين أو حتي ميعرفش أنها دولة من دول الشنجن . من عادتي دايما اني بحب أتجه في سفرياتي للدول اللي مش معروفة سياحيا , و بتفاجئ بجمالها و بجمال ثقافتها , و يمكن بستمتع فيهم أكتر من دول مشهورة سياحيا ..

في المقالة دي هقولك عن بلد بعتبرها سر من أسرار أوروبا الشرقية .. و هقولك عن رحلتي ليها و ليه حبيتها من وجهة نظري و ليه عايز أزورها تاني ..

[lwptoc colorScheme=”inherit” borderColor=”#dd8604″]

فين ليتوانيا ؟

ليتوانيا دولة من دول بحر البلطيق و كذلك عضو في الأتحاد الأوروبي و منطقة الشنجن , و كمان عضو في حلف شمال الأطلسي … ليتوانيا بيحدها  لاتفيا في الشمال , و بيلاروسيا من الشرق , و بولندا و كالنينجراد (روسيا) من الجنوب و طبعا بحر البطيق من الغرب …

ليتوانيا من دول الأتحاد السوفيتي السابق , و لو انها مختلفة كل الأختلاف عن روسيا أو حتي عن بقية دول شرق أوروبا … رحلتي ليها كانت مع أتنين من أصدقائي المقربين , و اللي رحلتنا ليها كانت من ضمن رحلة حوالين كذا دولة في أوروبا … بدأناها من لاتفيا المجاورة , و خدنا منها أتوبيس إلي العاصمة الليتوانية فيلنيوس في رحلة مدتها حوالي 4 ساعات بالأتوبيس …

طبعا فيزا ليتوانيا هي فيزا الشنجن , و علي فكرة ليتوانيا هي من أقل دول الشنجن رفضا للمتقدمين ليها في أخر كام سنة , مش معني ده أنك هتاخد الفيزا لو ورقك ناقص , أكيد لأ طبعا , بس لو ظبطت ورقك كويس زي قولتلك في مقالة فيزا الشنجن هيبقي سهل أوي تاخد الفيزا.

أما لو داخل الشنجن من أي دولة تانية , سهل أوي تلاقي طيران رخيص من و إلي فيلنيوس . و فعلا البلد تستاهل انك تزورها .

مدن ليتوانيا القديمة :

اللي بيميز البلد جدا هي مدنها القديمة , لما تزور فيلنيوس هتستمتع جدا بمدينها القديمة , تستكشف فيها المعمار الرائع و الطابع المميز لمبانيها و كنائسها , زي مثلا كنيسة القديسة اّن  St. Anne Church  و اللي علي الطراز القوطي .

وسط المدينة القديمة في فيلنيوس فعلا من أحلي المدن القديمة في أوروبا .

المناخ و الطبيعة في ليتوانيا :

ليتوانيا بتتميز بكونها فيها كل فصول العام , الشتاء و الصيف و الربيع و الخريف … لما زرتها كان في الشتاء فصلي المفضل , الجو بيكون بارد و ممطر و تتساقط الثلوج في الشتا .

ما صيفها معتدل و تقدر تستمتع بشواطئها و حدائقها الوطنية الشهيرة … ليتوانيا فيها طبيعة من أجمل ما في أوروبا من بحيرات و غابات و حدائق وطنية طبيعية كعادة معظم دول البلطيق و شرق أوروبا بصفة عامة … فلو كنت من محبي الطبيعة و الهدوء زيي صدقني هتحب ليتوانيا جدا …

المصاريف في ليتوانيا :

المميز جدا في ليتوانيا انها رخيصة جددددا , حتي أرخص من جارتها لاتفيا و من معظم دول شرق أوروبا , و ده اللي يخليها وجهة مميزة للي عايز يستمتع بالطبيعة و باستكشاف ثقافة جديدة و في نفس الوقت يكون علي ميزانية محدودة …

الأقامة رخيصة جدا كمان , ممكن سهل أوي تلاقي سرير في هوستل بسعر يتراوح من 5 إلي 10 دولار في الليلة .

أو ممكن عن طريق Airnbnb تلاقي شقة أو ستوديو صغير بحوالي 20 دولار … و لو حبيت تعرف أكتر عن أنواع الأقامات المختلفة و ازاي تختار الأنسب ليك , اقرأ مقالة ” كل اللي محتاج تعرفه قبل حجز أقامتك” هتلاقي فيه شرح لكل حاجه بالتفصيل بخصوص مزايا و عيوب كل حاجه فيما يخص الأقامة.

المطبخ الليتواني :

قبل ما ازور ليتوانيا مكنتش أعرف أي حاجه عن الأكل الليتواني , بس صدقني لو جربته هتحبه جدا . هتلاحظ ان البطاطس مكون هام جدا و داخل في أطباق كتير في المطبخ الليتواني , من أشهر الأطباق هناك هو ال Cepelinai  و ده ترجمته الحرفية هي المنطاد , و ده اتسمي كده لأنه عباره عن بطاطس محشية لحم أو جبن أو مشروم و متشكل كشكل المنطاد …

و شوربة ال Beet Root أو جذور الشمندر من أشهر الشوربات في المطبخ الليتواني أو معظم مطابخ منطقة بحر البلطيق , مشهورة بلونها الأحمر المميز و طعمها لذيذ جدا …

هيعجبك جدا المطبخ الليتواني و القريب جدا من اللاتفي و الروسي..

الأكل في ليتوانيا ميزته انه رخيص لو ملتزم بميزانية , بعمني أن ممكن تلاقي وجبة رخيصة بحوالي 5 يورو لو حبيت , يمكن أرخص كمان من لاتفيا الدولة اللي تعتبر رخيصة جدا مقارنة بغرب أوروبا.

جمهورية أوزوبيس جوا العاصمة :

علي بعد خطوات من المدينة القديمة داخل العاصمة الليتوانية فيلنيوس  و علي الجهة الأخري من نهر فيلنيا هتلاقي جمهورية أوزوبيس … و هي مساحة يعيش فيها حوالي 7000 نسمة منهم 1000 من الفنانين , و اللي أستقلوا بنفسهم عن ليتوانيا و عملوا دولة خاصة بيهم تتميز بالطابع الفني البوهيمي …

تمثال ملاك أوزوبيس

أوزوبيس معناها الحرفي في اللغة الليتوانية “الجانب الأخر من النهر” , و المقصود هنا هو نهر فيلنيا اللي اتاخد اسم العاصمة فيلنيوس منه …

أوزوبيس مدينة ليها دستور خاص بيها , و حتي لما تزورها هيعرضوا عليك يختمولك الباسبور بختمهم الخاص , بلد جميلة و مجنونة بداخل فيلنيوس …

قلعة تراكاي …من أقدم قلاع أوروبا :

لو هتزور فيلنيوس , حاول تزور قلعة تراكاي الشهيرة اللي هتحس انها قلعة من قلاع الحكايات الخيالية  , القلعة اتبنت سنة 1409 , تراكاي تعتبر العاصمة القديمة لليتوانيا , القلعة مميزة انها علي جزيرة و محاطة ببحيرات تراكاي .

لو زرتها في الشتاء  و درجة الحرارة تحت درجة التجمد هتلاقي كل البحيرات مجمدة و تقدر تمشي عليها … تجربة فعلا لازم تعملها …

الشعب الليتواني :

دايما اللي زار كذا دولة أو اتعامل مع كذا شعب هيلاقي فيه فروقات عامة بين الشعوب , المميز في الشعب الليتواني انه شعب طيب و دافي و مضياف و مثقف … يمكن اللي يقرأ ان مثلا ليتوانيا كانت من دول الأتحاد السوفيتي فيتخيل أن الشعب الليتواني بارد إلي حد ما زي الشغب الروسي , انا نفسي كنت واخد الفكرة دي قبل ما ازور ليتوانيا …

لكن في الحقيقة الشعب الليتواني مختلف عن اي شعب تاني , و ده هتحسه أوي و انت بتتعامل مع الناس في الشارع أو في المحلات , و دي حاجه بعتبرها ميزة في زيارتك للدولة الجميلة الهادية دي …

شوية نصائح لو قررت تسافر ليتوانيا :

-لو انت ملكش في الهدوء و الطبيعة و فاكر ان ليتوانيا دولة أوروبية زحمة هتروح تتصور صورتين تحت برج ايفل يبقي بلاش تزورها لانك مش هتستمتع …. ليتوانيا بلد مختلفة و طابعها مختلف عن دول كتير في غرب أوروبا أو حتي شرق أوروبا .

-خطط كويس و أقرأ كتبر عن البلد , المقالة دي مجرد فكرة عامة عن ليتوانيا , ليتوانيا فيها مدن كتير زي فيلنيوس , كاوناس , كليبيدا , فيلكيجا … إلخ , و صدقني هتستمتع فيهم اكتر من فيلنيوس .

-البلد فعلا رخيصة , بس الفكرة لازم تبقي عارف أنت بتعمل ايه , و هتحس بفرق كبير بينها و بين دول اوروبية كتير .

-كل فصل في ليتوانيا مختلف , سافرلها في الفصل اللي بتحبه , انا عن نفسي بعشق الشتا و كانت جنة بالنسبالي .

-ليتوانيا عايزة سفرية لوحدها , غلطتي اني خليتها من ضمن كذا بلد في رحلة واحدة فملحقتش أزور كل حاجه نفسي فيها , و ان شاء الله ناوي ارجعلها تاني و ألف في مدنها لأن معظم مدنها تستاهل انها تتزار .

زرت ليتوانيا قبل كده؟ حابب تشاركنا بتجربتك؟ عندك أي استفسار أو سؤال عن البلد الجميلة دي؟ شاركني بيه في الكومنتات أو صفحات السوشيال ميديا …