وجهات Destinations

أرض الجليد و النار … 10 أسباب تخليك لازم تزور آيسلندا

on
فبراير 1, 2019

ناس كتير اوي بتحلم تزور آيسلندا … من صغري كان حلمي اني ازور البلد الساحرة دي اللي هتحس اول ما هتدخلها لغاية ما تسيبها انك في أرض خيالية ملهاش مثيل في أي مكان في العالم …

مين فينا مشافش صور خيالية من آيسلندا سواء صور لأضواء الشفق القطبي (الاورورا) او صور للخيول الآيسلندية أو للطبيعة البكر اللي ملهاش مثيل …

ليه لازم تزور آيسلندا

و بما ان آيسلندا بعتبرها من أحلي و أجمل البلاد اللي زرتها , و بما ان الكلام عن آيسلندا من حيث التخطيط للسفر ليها و تكلفة السفر او الاقامة او كل ده مش هيكفيه مقالة واحدة , قررت أني اتكلم عن آيسلندا في كذا مقالة علشان يكون الكلام بالتفصيل …

انهارده هقولك علي علي 10 أسباب تخليك لازم تزور آيسلندا … أرض الجليد و النار …

 

 

1-البحث عن أضواء الشفق القطبي (الأوروا) :

أهم سبب من وجهة نظري ان تزور آيسلندا , الأورورا تقدر تشوفها من سبتمبر لنص أبريل , بس طبعا في شهور الشتاء افضل علشان تضمن انك تشوفها … و ده اللي خلاني ازورها في الشتاء …

علشان تقدر تشوف الأورورا لازم تكون السما صافية من غير اي سحب , و في اوقات و مواقع معينة , علشان كده بنصحك تأجر سيارة لو بتعرف تسوق زي ما عملت علشان تبقي حر في تحركاتك .

و فيه مواقع كتير بتتوقع أماكن الأورورا في أيسلندا زي موقع vedur.is   و ده موقع رسمي آيسلندي تقدر تتابع بيه أحوال الطقس و اماكن الأورورا .. الموقع ده ضروري جدا في الشتا علشان الأجواء بتكون صعبة فلازم تكون عارف كويس اخبار الطقس قبل اي تحرك.

اللحظة اللي هتشوف فيها الأورورا بتتراقص في السما هتحس بسعادة غير طبيعية , انا قضيت ليلة كاملة جوه العربية بتفرج علي المنظر ده و مقدرتش اسيبه و امشي …

 

 

2-الحصان الآيسلندي من أهم أسباب انك تزور آيسلندا :

الحصان الأيسلندي

و ده كان تاني سبب بالنسبالي لاني أزور الجنة دي … الحصان ده دخله الفايكنج و هما بيستقروا في آيسلندا , و تحملت السلالة دي الجو القارس و الأراضي الصعبة , و بقي الي يومنا هذا الاف الخيول في ايسلندا اللي بتتميز بالجمال و القوة و الشخصية الودودة…

أول ما هتسوق علي الطريق السريع هتتفاجئ بالمنظر الخيالي للخيول البرية اللي علي جانبي الطريق , هتلاقي نفسك بتركن العربية و بتنزل تتصور معاهم و تشوف أد ايه هي كائنات ودودة و حلوة أوي …

 

 

3-قيادة السيارة في آيسلندا :

لما تزور آيسلندا هتلاقي ان البلد عبارة عن مدن صغيرة متفرقة و بينهم مسافات شاسعة غير مأهولة , و فيه اماكن سياحية كتير بعيدة عن المدن و بالتالي الوصول ليها بالمواصلات العامة صعب جدا … ده غير ان آيسلندا كل 100 متر فيها مكان يستاهل انك تنزل تشوفه , انا مببالغش لما بقول هي جنة ..

فبالتالي علشان تستمتع بيها , هو حاجه من اتنين … اولا تتفق مع شركة سياحة هناك تنظملك برنامج سياحي … و الحل التاني انك تأجر سيارة …

و انا بفضل و بنصح كل الناس بفكرة تأجير سيارة هناك , اولا لأنها ارخص و خصوصا لو انكم اصحاب مع بعض , ثانيا لأنك هتبقي حر تتحرك براحتك …

و اهم من ده انك هتحس بمتعة غير طبيعية و انت سايق , المناظر خرافية حواليك و انت سايق , هتحس انك في حلم …

خلي بالك من حاجه :لو هتسافر في الشتا و عمرك ما سوقت سيارة قبل كده في الثلوج , يبقي فكر ألف مرة قبل ما تسوق , انا قريت علي النت من تحذيرات بخصوص القيادة في الشتاء في آيسلندا , بس انا قررت اخوض المغامرة و مندمتش اني عملت كده , أهم حاجه انك تلتزم بالسرعة المقررة لأن صدقني لو قررت انك تجري علي التلج هتلاقي العربية بتلف حوالين نفسها و مش هتعرف تتحكم فيها …

 

 

4-شمس منتصف الليل :

في شهور الصيف شمس شبه بتبقي موجودة طول اليوم في السما , بعكس الشتا اللي أغلبية اليوم بتكون ظلام … في الشهور ما بين اخر مايو و اخر يوليو تقدر تشوف الشمس في منتصف الليل لسه في السما …

التجربة دي فعلا فريدة و تستاهل انك تشوفها لو مخطط تزور آيسلندا في الصيف .

 

 

5-الشلالات :

شلال Seljalandsfoss

أكتر حاجه هتجذب نظرك و أنت هناك هي الشلالات الرائعة اللي في كذا مكان حوالين آيسلندا , و ده بفضل الطبيعة الآيسلندية اللي مليانة مرتفعات و منخفضات فسهل أوي تلاقي شلالات طول ما انت ماشي بتستكشف في البلد.

شلالات Skogafoss

شلالات Skogafoss

منظر الميه و هي نازلة بطريقة ساحرة و تصطدم بالصخور البركانية منظر فعلا لا يوصف …

 

6-السباحة في المياة الدافئة :

بما ان آيسلندا بتقع فوق منطقة بركانية و بما ان البراكين منذ الاف السنين شكلتها , علشان كده هتلاقي بحيرات كتيير أوي طبيعية دافئة جدا بسبب الطاقة الحرارية من باطن الأرض , من أشهرهم ال Blue Lagoon الشهير اللي أكيد شفت صورته قبل كده لان أيقونة من أيقونات البلد …

المياة فيه مليانه بمعادن طبيعية زي الكبريت و السيليكا , و المياة دي ليها قدرات استشفائية و فوائد عديدة للبشرة ..

 

7-شواطئ آيسلندا السوداء:

سبب اخر يخليك تزور آيسلندا هو شواطئها السوداء الفريدة , و خصوصا شاطئ رينيسفيارا Reynisfjara beach   القريب من قرية فيك Vik علي الساحل الجنوبي , منظر الحصي الأسود علي الشاطئ و الأحجار البازلتية البركانية السوداء مع أمواج البحر و رائحة البحر و الجو الفريد فعلا احساس لا يوصف …

 

8-بحيرة يوكولسارلون الجليدية Jökulsárlón Glacier Lagoon:

و دي تاني أعمق بحيرة جليدية في آيسلندا و من أحب الأماكن لقلبي في آيسلندا , هتحس بجمالها اول ما تقرب منها و تشوفها بعينك , هي عبارة عن بحيرة فيها مئات الكتل الثلجية المتجمدة العايمة علي سطح المياة في مشهد خيالي …

البحيرة دي ظهرت في أفلام كتير منها فيلمين لجيمس بوند , و فعلا هتروح هناك مش هتبقي عايز تمشي و تسيب المنظر التحفة ده …

 

 

9-أستكشف الكهوف الثلجية :

من أحلي الحاجات اللي ممكن تعملها لما تزور آيسلندا هي زيارة  و استكشاف الكهوف الثلجية اللي ملهاش مثيل , الكهوف دي تقدر تزورها في شهور الشتا بس و اللي بتكون متكونة من التلج بين الجبال الثلجية , طبعا نصيحة متحاولش تزور الكهوف دي لوحدك لازم تنظمها مع شركة سياحة لان بتحتاج معدات معينة و يكون معاك مرشد …

 

 

10-لأن أيسلندا أمان جدا :

و ده هتشوفه بعينك لما تزور آيسلندا , في معظم الدراسات اللي اتعملت دايما ترتيبها بيكون الأول في الأمن و الأمان و شبه اختفاء معدلات الجريمة …

الخطورة الوحيدة اللي ممكن تقابلها هي حالة الطقس في الشتاء لو ملتزمتش بالنصائح و تابعت حالة الطقس اول بأول … فيه أبليكيشن ضروووري جدددا لازم يكون علي موبايلك اسمه 122Iceland App و ده فايدته انك تقدر تطلب منه مساعدة السلطات لو حصل لاقدر الله أي طوارئ و بيكونوا عندك في أسرع وقت من خلال الأقمار الصناعية GPS  , البرنامج ده هشرحهولك بالتفصيل في المقالات القادمة عن آيسلندا ان شاء الله…

بس فعلا من كل البلاد اللي زرتها آيسلندا كانت أكتر بلد حسيت بيها بالأمان و هتحس فعلا ان ملهاش مثيل …

 

 

أسباب كتييير تخليك لازم تزور آيسلندا مش بس 10 , و في المقالات الجاية هنتكلم عن ازاي تخطط للسفر لآيسلندا و تكلفتها و ايه النصائح اللي لازم تخلي بالك منها علشان تقدر تنفذ رحلة العمر اللي مش هتنساها طول عمرك ….

هنهي المقالة دي بفيديو لمقتطفات رحلتي التي لا تنسي لآيسلندا كنت عملته من فترة في مدونتي القديمة , الفيديو هيخليك تعيش الجو العام للبلد الجميلة دي

 

TAGS
RELATED POSTS

اترك تعليق

avatar
  Subscribe  
نبّهني عن
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.