وجهات Destinations

السفر إلي ميلانو ..7 أسباب تخليك لازم تزور عاصمة الموضة الإيطالية

on
أبريل 20, 2019

السفر إلي ميلانو أو إيطاليا دي حاجه من الحاجات اللي بيتطلع ليها الكثير و ده لغني إيطاليا الثقافي و التاريخي و الأجتماعي و حتي الرياضي …

ميلانو أنا زرتها في 2016 في زيارة قصيرة لمدة 3 أيام , حاجات كتير عجبتني فيها و حاجات معجبتنيش , بس بصفة عامة هي مدينة لازم تزورها علي الأقل مرة في العمر .

لو لسه بتفكر في السفر إلي ميلانو أو لسه متردد … انهارده هقولك علي 7 أسباب تحليك لازم تزور عاصمة الموضة … ميلانو

 

 

 

1- طبيعة ميلانو كمدينة :

ميلانو

 

ميلانو تعتبر من أكبر مدن إيطاليا و خامس أكبر مدن أوروبا و كذلك هي تعتبر من أغني مدن إيطاليا ,هي بتقع في شمال إيطاليا و مختلفة كل الأختلاف عن وسط أو جنوب إيطاليا …

لو بتفكر في السفر إلي ميلانو مش هتندم لأنها فعلا مدينة فريدة بتجمع بين التاريخ و الحداثة , و ده هتحسه أوي و انت ماشي في شوارعها او في ميادينها … أو حتي في وشوش ناسها ..

المميز في ميلانو انها أخف زحاما شوية عن روما أو فينيسيا أو فلورنسا … علشان كده لو بتفكر تزور إيطاليا فكر في السفر إلي ميلانو و حتي هتلاقي شركات طيران رخيصة كتير زي RyanAir او غيرها بيسافروا من و إلي ميلانو ..

 

 

 

2- الفن و التاريخ في كل مكان :

 

ميلانو مختلفة شوية عن فلورنسا او روما من حيث الفن , لكن ميلانو فيها كم هائل من المتاحف و المعارض الفنية , و المباني التاريخي اللي ذات المعمار اللي هيخليك مستمتع بيه جدا و انت بتشوفه …

طبعا أول حاجه لازم أتكلم عنها هي أيقونة ميلانو الشهيرة كاتدرائية الدومو Duomo Cathedral الفريدة … المبنية علي الطراز القوطي الإيطالي Gothic architecture  , الكاتدرائية استغرق بنائها أكتر من 600 سنة …

قبل السفر إلي ميلانو لازم تحجز أونلاين تذكرة للروف بتاع الكاتدرائية لانه يستاهل انك تطلعه , من فوق هتشوف منظر خرافي لجبال الألب , و منظر بانورامي لكل المدينة ..

بالقرب من ساحة الكاتدرائية هتلاقي ممر يعتبر من أقدم المولات في إيطاليا اللي اسمه جاليريا فيتوريو إيمانويل , الممر ده اتبني في القرن التاسع عشر , و لما تزوره هتلاقي فيه محلات أفخر البراندات العالمية للملابس و المجوهرات و الكتب و المطاعم و الكافيهات , مميز جدا بسقفه المبني من الحديد و الزجاج المزخرف , هتحس انه خليط بين التاريخ و الحداثة ..

 

لوحة العشاء الأخير لليوناردو دافينشي , تقدر تشوفها بنفسك في ميلانو  في دير سانتا ماريا ديللا جراتسي Santa Maria della Grazie, لكن خلي بالك انك برضه لازم تحجز من بدري أوي علشان تقدر تدخل تشوفها بسبب الزحمة ..

ده غير متحف دافنشي للعلوم و التكنولوجيا اللي حاجه كده وهم , ده غير قلعة سفورزيسكو و حاجات تانية كتير تستحق انك تشوفها في المدينة الفريدة دي  و فعلا هتحس أن السفر إلي ميلانو تجربة ثقافية غنية جدا ..

 

 

3- مينفعش نتكلم عن السفر إلي ميلانو من غير ما نتكلم عن الأكل:

 

و لأن ميلانو مدينة عالمية , فطبيعي جدا تلاقي مطاعم بتقدم أكلات من حول العالم زي الأكل الأسيوي او الشرق أوسطي أو الفرنسي أو أو أو … بس خلينا منطقيين , انت مش هتروح ميلانو علشان تاكل كنتاكي او مكدونالد أو دونير تركي – ولو ان فيه ناس بيعملوا كده :p –  علشان كده هتكلم عن الأكل الأيطالي و اللي ميلانو فعلا مبدعه في مطاعمها …

ريزوتو بالزعفران

 

سواء بتحب الباستا الهاند ميد , او البيتزا الأيطالية الفريدة , أو اللحوم او السي فود … صدقني المطبخ الميلانيزي رهيب … مينفعش متجربش البيتزا الإيطالية الأصلية في ميلانو , و كمان الطبق الشهير هناك الريزوتو بالزعفران …مش هتندم 🙂

 

 

4- منطقة نافيجلي :

مينفعش برضه أتكلم عن السفر إلي ميلانو من غير ما أجيب سيرة منطقة نافيجلي … للأسف معظم اللي بيزور المدينة ميعرفش المنطقة دي و لا بيزورها …

المنطقة دي مليانه قنوات مائية تحس انك في أمستردام , تقدر تركب مركب فيها , ده غير المطاعم و الكافيهات اللي فيها ..

كمان فيها كنيسة سان لورينزو اللي بترجع تاريخها للقرن الرابع الميلادي , و بالتالي تعتبر أقدم كنائس المدينة و تستحق انك تشوفها ..

 

 

5- لو بتحب الشوبنج … فدي عاصمة الموضة :

 

الكل بيقول ان باريس هي عاصمة الموضة اوروبيا و عالميا, لكن أصوات كتير بتقول أن ميلانو بتنافسها علي اللقب ده..

لو بتحب الشوبنج , اعرف كويس أن ميلانو فيها كل البراندات العالمية زي فالانتينو , فرزاتشي , دولتشي اند جابانا , برادا … إلخ , ده غير البراندات الجديدة اللي بتطلع كل يوم في المدينة دي ..

 

6- الناس :

 

الشعب الإيطالي حسيت أوي أنه فيه كتير من صفات شعوب الشرق الأوسط كطباع , مختلفين جدا عن دول شمال أوروبا … غالبا هتحس أن معظم شعوب البحر المتوسط بيتشاركوا في صفات كتير …

عمري ما هنسي مثلا لما كنت في الأتوبيس النقل العام أول مره أروح فيها من البيت اللي كنت مأجره من الAirbnb  لغاية ميدان الدومو الرئيسي في ميلانو , و سألت اللي جنبي عن أسهل طريقة أروح بيها للميدان , لك ان تتخيل أن في خلال دقيقتين كان 70% من الناس اللي في الأتوبيس بيحاولوا يوصفولي الطريق و كلهم بيتكلموا في نفس الوقت و الغريب انهم كانوا بيشرحولي بالإيطالي :’D

الشعب الإيطالي شعب طيب , أحيانا بيكون عصبي بس أنت كسائح هتلاقيهم طيبين و مرحبين جدا …

ملحوظة و دي ضايقتني شوية في ميلان , و هي كون ميلان أغني مدن إيطاليا , فطول ما أنت ماشي هتلاقي في الشارع مهاجرين هجرة غير شرعية كتيييير سواء عرب أو أفارقة أو صينيين … منهم اللي بيتسول و منهم اللي بيبيع أي حاجه في الشارع و هيفضل يلح عليك علشان تشتري منه …إلخ

حاول دايما متحتكش بحد , لو فاكر في مقالة ازاي تتفادي طرق النصب و انت مسافر اتكلمنا عن انك اوعي تمشي بالباسبور في الشارع , تسيبه في خزنة الهوستل أو الفندق بتاعتك و تمشي فقط بنسخة ضوئية منه , علشان لاقدر الله ميتسرقش أو يضبع منك ..

 

 

7- التكلفة :

 

و دي الحاجه اللي بتهمنا كلنا … لما أجي اخطط السفر إلي ميلانو , أعمل حسابي اني هصرف كام و انا هناك ؟

مبدأيا انت لو قلنا هتنزل في هوستل مثلا , و هتاكل في مطاعم رخيصة أو هتجيب أكل و تعمله في مطبخ الهوستل و تركب مواصلات عامة … فغالبا هتحتاج من 50-70 يورو في اليوم شاملة الأقامة و المواصلات و الأكل …

طبعا التكلفة دي تزيد أو تقل حسب كل واحد فينا , لكن ده من وجهة نظري المتوسط اللي ممكن تدقعه لو انت  ..backpacker

 

 

 

 

 

سافرت ميلانو قبل كده ؟؟ جابب تضيف حاجه للمقالة ؟ عندك أي سؤال؟ شاركنا بيه في الكومنتات أو صفحات السوشيال ميديا …

 

 

 

 

TAGS
RELATED POSTS

اترك تعليق

avatar
  Subscribe  
نبّهني عن
محمد حماد
🇪🇬 Egypt

أنا محمد ... مدمن سفر ... سافرت كتير و حلمي اني الف العالم كله . قررت اعمل المدونة دي علشان تكون مصدر لكل ما يخص السفر من تأشيرات , و معلومات عن دول العالم المختلفة و اسرار ازاي تلف العالم بأقل الامكانيات و اسهل الطرق .

ابحث في الموقع

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.

تابعنا علي Facebook

متخليش أي مقالة تفوتك و انضم لعائلة
Passport Trails

اشترك في القائمة البريدية علشان توصلك المقالات و النصائح الحصرية أول بأول

شكرا علي أشتراكك.

هناك خطأ في الأشتراك.